THE PATH O DULE


Voice 	Yin	Blissit be Christ
Lat oor luv be wi you
Thru your haly cross
Oor warld is redeemit.
	Twa	His heid crounit wi thorns
His back rypit an scourit
Judge o the leevin an the deid
Himsel doomit tae sair daith.
	Three	See the wid o the cross
Oan whilk is foundit oor release
Cum aa ye fowk tae wurship.
Aa thegither	Blissit be Christ
Lat oor luv be wi you
Thru your haly cross
Oor warld is redeemit.
	Yin	He tholes the muckle cross
Laid oan his shouders.
	Twa	Boued aneth his load
He gaes oan an further oan
Tae Golgotha, the field o skulls.
	Three	See the straiks, the aiths, an cursin
He fooners … an faas … God peety him.
Aa thegither	Blissit be Christ
Lat oor luv be wi you
Thru your haly cross
Oor warld is redeemit.
	Twa	He graipples wi the cross aince mair.
	Yin	His mither’s watchin frae near-haund.
	Three	He cannae gang nae further.
Aa thegither	Blissit be Christ
Lat oor luv be wi you
Thru your haly cross
Oor warld is redeemit.
	Three	Simon o Cyrene taks the cross.
	Yin	It’s pooer his hert had cheengit.
	Twa	Thae haurd timmers hae becum 
His honour an his gledness.
Aa thegither	Blissit be Christ
Lat oor luv be wi you
Thru your haly cross
Oor warld is redeemit.
	Yin	He kin haurdly pit 
yin fit afore anither.
	Three	The swait o daith 
is oan his ass-white body.
	Twa	A wumman wipes his face
Wi a cloot sae tender, 
She wad tak him in her airms.
Aa thegither	Blissit be Christ
Lat oor luv be wi you
Thru your haly cross
Oor warld is redeemit.
	Yin	“Dauchters o Jerusalem 
greet no fur me 
but fur yersels an fur your bairns.”
	Twa	See the wid o the cross
Oan whilk is foundit oor release
Cum aa ye fowk tae wurship.
	Three	An adore him.
Aa thegither	Blissit be Christ
Lat oor luv be wi you
Thru your haly cross
Oor warld is redeemit.



Donald Smith
inspired bi The Duddingston Passion