A Spring Carol
Tune: Kingsfold (CH3 220; CH4 291)





The mavis on the tapmaist brainch
Sings oot at skraich o day,
And waukens aa the mirksome warld
Til sunlicht’s warmin ray.
May aa oor cauldrife herts be warmt
Wi dawin o God’s love,
An may oor sangs o joy speel up
Til heiven’s yett’s above.

The tremmlin birk pits on its goun,
The lairick’s shawin reid;
The sauchs alang the burnie side
Glint fite like siller threid.
Mair bricht nor Solomon’s gowden croun
The flouers o Spring-tide glow,
Like picters fae a penter’s wark
Laid oot on earth ablow.

The bairnies in a fremmit lan
Wi palm-leafs in their haun
Sang, mavis-like, their sangs o love
Tae reeze the Son o man.
Fan birds and flouers and bairnies’ een
Bring oot the joys o Spring
We canna but be glaid this day - 
Sing praises til oor King.



							Alistair Taylor