Worship on the Web  

STARTERS FOR SUNDAY
Scots i the Kirk i Lent
LENT SYMBOL SEQUENCE
This symbol sequence is set our for use as part of a (bilingual) service each Sunday in Lent.  With appropriate adaptation and reordering it could be used at Holy Week services, or indeed as the thread of one particular service in Lent.

Required are a large purple cloth to be unfolded over a table right down to the floor (or hung against a wall ); the five other symbols cut out of felt.  The cross (red) should be large enough that when placed centrally the other four symbols (e.g. in pale blue)  fit within its arms.  The cloth is unfolded as the words are said, and the symbols pinned on likewise in sequence.

1) Purpie
	The sodgers ... cled him in a purpie mantille, efter whilk they made a ploy o comin up til him wi a "Hail, the King o Jews."  (St. John 19.2 - Lorimer)
	
The warld tapsalteerie:  purpie, the claith worn bi wee bit kings for their glorie, yuised tae jamph the King o aa.

Prayer:-   Lord Jesus, 'twis the Deivil shawed ye aa the kingdoms o the yird in a gliffin, an telt ye they'd be yours gin ye'd but gang doun on your knees tae him, but ye wadna; help us tae seek the the Kingdom o God first an last, for your Name's sake.
 

2) Three nails
	Is he no the wricht, Mary's son?  (St.Mark 6.3 - Lorimer)
	
The warld tapsalteerie:  nails, at a joiner wad yuise tae bigg bield for fowk leevin thegither, pinnin the maker an saufer o aa til the gallows, exposed an cast oot o the bundle o life.

Prayer:-   Lord Jesus, whan the wumman thocht ye wad hae nae trokins wi her, ye hed a crack wi her, an whan nane wad gang near the lipper, ye pat your haunds on them; shaw us the gate, for we wad gang furth til them outwith the camp, the warld's scorn an aa, an finnd ye, Lamb o God. 
						

3) A whang o lingels
	Pilate nou tuik Jesus an gart leash him.  (St. John 19.1 - Lorimer) 
	
The warld tapsalteerie:  a whang,  guid for drivin the beass frae God's houss an makin it apen tae aa nations, 	yuised tae mittle the true Hie Priest.

Prayer:-  Lord Jesus,
				’twis bi oor fauts ye wis tangit an bi oor ill-dae’n birzed an bangit,
				bot your beatin hes brocht us oor weel an your weals hae coft us oor heal.
		As ye prayed, "Faither, forgie them, for they kenna what they ar daein,"
		pray for hiz,  at we forgie as we hae bin forgien; 
		pray for the hail warld, an gar us pray wi ye,
				for your luv's sake.
			
4) A croun o thorn-rysses
	The sodgers than plettit a wreathe wi thorn-rysses an pat it on his heid. (St. John 19.2 - Lorimer)  
	
The warld tapsalteerie:  aiblins a rose for his luv! bot they gied him the thorns o their scorn.

Prayer:-  Lord Jesus,
			what bonnie the floors, mair nor onie king's buskin!
		Ower aften creation, sae bonnie an blithe, is ill yased;
		learn us raither tae shout wi the seas an the rivers,
		an sing wi the fouls i your praise. 


5) A cross
	They raired out, "Tak him awa, tak him awa!  Tae the cross wi him! ... Sae they tuik Jesus, an he gaed furth o the toun, cairrien his cross himsel.  (St. John 19.15,17 - Lorimer)
	
	The warld tapsalteerie: the true man din awa wi as fauss.
	
Prayer:-  Lord Jesus, we ar amind tae haud efter ye an think nae mair o oorsels, but want the pith tae tak up oor cross day an dailie; gie us o your strang Spirit tae keep us traivellin i the gate o true humanity, for your glorie.
  					

6) A palm-rys
	They tuik palm-rysses i their haunds and gaed out tae meet him, cryin out loud as they gaed
		"Hosannah!
		Blissins on him at comes i the name o the Lord,
		the King o Israel!"
						(St. John 12.13 - Lorimer)

	Wad that fowk wad ey bliss him an dae nane ither!

	Prayer:- Gie laud til the Lord, for he's guid,
		    for his guidness it tholes for ay.
		Lat Israel say siclike;
		    for his guidness it tholes for ay.
		Nane sal I die, bot sal livin be;
		   an the warks o the Lord I sal tell.
		The Lord, he micht ettle til ding me sair;
		    bot til deid he wad ne'r gie mysel.
		O rax me wide the yetts o the guid;
		    it's by them, I s' win ben
		    whan I ettle the Lord til laud:
		for that's ay the yett till the Lord;
		    by its-lane sal the richtous win ben.
		Laud til yersel I maun gie,
		    for ye harkened til me
		    an help ye bin ay til me syne.
						(frae Ps.118 - Hately Waddell)
			 


Printed from www.churchofscotland.org.uk/worship