In the Stable
Tune: The Flower o the Quern (CH4 No.552ii )


On Christmas nicht I dreamt a dream,
	Twis o a stable bare,
An by the cruisie’s gutt'rin licht
	I hid a vision rare.
A mither, Mary wis her name,
	Sat on a bucht o strae,
An cuddlin doon aside the beass
	Her bonnie littlin lay.

A gowden star wis ower his heid
	An een on ilka haun;
An staunin guaird wir Three Wise Men,
	The richest in the lan.
I saa the chiels in silken robes
	Gyan doon on bendit knee
An hummle-like, wi hauns oot-stretched,
	Haud oot gowd caskets three.

Syne Baby Jesu lookit up
	Wi sadness in His ee
At aa the fouth o sin at blins
	An deaves humanitie.
At skreich o day the vision blurr’t
	An peace cam wi the licht,
Bit til I dee I'll n'er forget
	Thon blessit Christmas Nicht.


James D. Glennie