5 readins din intil Scots bi David Ogston

ISAIAH 9, vs. 2,3

Them that traivelled in mirk, they hae seen a gryte licht: them that wis sair made i the howe-dumb-deid, on them his licht cam doon.
Thou's made o them a growthie nation: thou's gien them a wheen o gledness; they gulravage afore ye like clyack hid come; like men faain tee ower a cairt-load o spulyie.



ISAIAH 9, vs. 6,7

For tae hiz a bairn his come: tae hiz a bairn is gien: an the wecht o rule wull faa on his shooders: an He wull be cryit, 'Winnerfu Coonsellor, God o Micht, Faither Ivverlaistin, Prince o Peace.'
His rule an His peace sall nivver devaul on Dauvit's throne, an ower His Kingdom, tae bigg it on foons ayont aa chynges; tae haud it ticht an siccar wie justice an gweedness fae this day on, till time's aa deen wi.  The eident virr o the Lord o Hosts will faisten this.



ISAIAH 11, vs. 1-4a,6

Up frae the reets o Jesse sall come up a sooker, green life.
An the Speerit o the Lord sall mak its hame in Him - the Wyce Spirit, the Mensefu Speerit, the Speerit o LORE an MICHT, the Speerit o Kennin, the fear o the Lord.
Nae ither thing wull He set His hert on bit the fear o the Lord.
He winna gyang bi the tales His een tell: nae mair than He'll pey muckle heed tae the dirl o His lugs: bit soothfast an aqual an aefauld wull aye be His wye wie the peer, His wye wie the sober an dowie.
Wolf an lamb thegither, leopard an kid, they'll coorie doon side bi side: the calf an the lion an the yearlin stirk wull a alike faa douce intae step ahin the Bairn at the heid o them.



ISAIAH 60, VS. 1-5a

Rise! be bricht! your licht his come! an the glorie o God his brocht ye the daw.
For mark ye, the yird wull be smored in nicht, an sae wull the face o clay: bit the Lord wull come an be mornin licht tae ye, an His glorie wull rax tae aabodie, een an aa.
An nations sall come tae yer licht, an kings tae yer bricht an blythe arisin.
Lift up yer heids - look roon aboot ye - they gaither tae you, they come aathegither.
Your sons wull come frae hine awa, an your dothers tee, rowed in the airms that cairry them.
Syne you wull see, your faces wull glister - your hert wull be lichtsome an lippin-fou.



MICAH 5, vs. 2-4

As for you, Bethlehem Ephrathah, for aa that ye'r juist a wee smout amon aa the clans o Judah:  oot o you wull come ANE tae tak Israel in haund, ANE frae lang back, ANE auld as time itsel.
God wull staund by tull the quine his her bairn: syne them that ar ootlins, brithers o His, wull come back tae the fowk o Israel.
An he wull staund up an hansel His flock wi gweed things i the pooer o the Lord, in the name abeen aa names, the Name of the Lord His God.
An they wull bide weel-hained, for noo he wull be gryte tae the faar, braid mairches o the yird.