A Bonnie Bairn wis Born
Tune: Kelvingrove (CH4 No.533 - duple time )

		



1 O in gweed King Dauvit’s Toon
	a bonnie bairn wis born,
O in gweed King Dauvit’s Toon
	a bonnie bairn wis born;
O in gweed King Dauvit’s Toon
Lay a sauviour wi nae croun:
Faar the muckle starn shone doun
	a bonnie bairn wis born.

2	In a stable cauld an bare
	a bonnie bairn wis born,
	In a stable cauld an bare
	a bonnie bairn wis born;
In a stable cauld an bare
Wi his mither he lay there:
Sae our tribbles he cou'd share
	a bonnie bairn wis born.

3	For the lads that drives the ploo
	a bonnie bairn wis born,
	For the lads that drives the ploo
	a bonnie bairn wis born;
For the lads that drives the ploo
An the lassies wyvin oo,
For the sake o me an you
	a bonnie bairn wis born.

4	Noo be thankfu an gie praise
	a bonnie bairn wis born,
	Noo be thankfu an gie praise
	a bonnie bairn wis born;
Noo be thankfu an gie praise,
An  yir voice ye aye sud raise,
An remember aa yir days
	a bonnie bairn wis born.



Leslie Wheeler