Whan Jesus wis bapteezit

Here is the blythe message o Jesus, Son o God, een as it is pit doon bi Isaiah the prophet  Lo! I send oot ma messenger afore yer face, wha sall redd the wey for His comin; the sang o ane cryin oot i the muirs, ‘Redd the wey o the Lord! Mak straucht his fit-roads!’

Syne kythit John, bapteezin in the muirlands and preachin repentance bapteezment for the pitten-awa o sins.  An thair gaed oot til John aa the countraside o Judea, an aa thae o Jerusalem, an they war bapteezit o him in the River Jordan, tellin oot their sins.

An John wis cleedit wi caumel hair, an had a lether girth aboot him; an he did eat o locusts an rock-hinny.  An quo he in his preachin, ‘Ane starker nor me comes efter me, the whang o whase shoon I amna fit tae lowt doon an lowse!  I watter-bapteeze ye, but he sall bapteeze ye wi the Halie Speerit!’

An in thae days it cam aboot that Jesus cam frae Nazareth, i Galilee, an wis bapteezit o John in the Jordan.  An he, comin straucht frae the watter, saw the Hevins apen up an the Speerit, like a doo, comin doon apon him.  A voice cam frae abune, sayin, ‘Ye are the Beluvit, ma son; in ye I delyte!’

An syne the Speerit led Jesus out intil the muirlauns.



(Frae ‘A Scots Gospel’ bi Jamie Stuart)