Metrical Psaum 72
Tune: Pentatone (R.C.H. 446 - for 'Amen' repeat last line)


1	Lord, gíe the King yer ain just weys,
		What’s richt til yon king’s son,
	Sae’s he sal judge yer fowk fu richt,
		For puir sauls richt bring in;
	Peace, syne, the heichts sal bring the fowk,
		The knowes see justice din.
	The Lord, the God o Israel bliss;
		Himlane sic wunners dis!

2	He s’ richt the puir amang the fowk,
		The feckless bairn help than - 
	Ey blissit be God’s Name sae gran,
		His glore fou ilka lan! - 
	Bot he sal intil flinders sen
		The loon wi hevie haun.
	The Lord, the God o Israel bliss;
		Himlane sic wunners dis!

3	Sae lang’s the sun an min shaw face
		He s’ líve, while fowk remain.
	As showirs on the swaith he s’ faa,
		An on the lan like rain;
	Fu green sal justice grow in’s days,
		An peace til min shínes nane.
	Ey blissit be God’s Name sae gran,
		His glore fou ilka lan!

4	Frae sea til sea sal he syne ring;
		Frae whaur the river glides
	Til benmaist neuks out-throuch the lan
		Them in the drouth at bides
	Sal lout til him, agrouf i stour
		Them at again him sides.
	The Lord, the God o Israel bliss;
		Himlane sic wunners dis!

5	Frae Tarshish an the iles sal kings
		Til him a hansel bring;
	The King o Sheba, gift til haun,
		Sal come wi Seba’s King;
	Ay, aa the kings sal lout til him,
		Aa outlans ken his ring.
	Ey blissit be God’s Name sae gran;
		His glore fou ilka lan!

6	His name it sal for iver líve,
		Ey wi the sun be ris.
	Aa fowk s’ be blissed in him; they’ll say,
		‘His life, what rare it is!’
	The Lord, the God o Israel bliss;
		Himlane sic wunners dis!
	Ey blissit be God’s Name sae gran;
		His glore fou ilka lan!

	Amen an sae lat it be.



Metrical Saum 72.1-11,17-19
efter P. Hately Waddell’s
The Psalms: frae Hebrew intil Scottis (1877)